اخلاص کی برکت اور تاثیر و طاقت

حضرت ابو عبدالرحمٰن عبداللہ بن عمر بن خطاب رضی اللہ تعالیٰ عنہ کہتے ہیں کہ میں نے سنا، رسول اللہ صلی اللہ علیہ وسلم فرماتے تھے کہ تم سے پہلی امتوں میں سے تین شخص کہیں جا رہے تھے جو ایک سفر پر نکلے تھے، حتیٰ کہ رات ہوگئی، چنانچہ رات گزارنے کے لیے وہ ایک غار میں داخل ہوگئے، تھوڑی ہی دیر کے بعد پہاڑ سے ایک بڑا سا پتھر لڑھک کر نیچے آیا جس نے غار کے دہانے کو بند کردیا، یہ دیکھ کر انہوں نے آپس میں مشورہ کیا، ان کی سمجھ میں یہی بات آئی کہ اس ابتلاء سے نجات کی یہی صورت ہے کہ تم اپنے اعمالِ صالحہ کے واسطے سے اللہ سے دعا کرو، چنانچہ انہوں نے اپنے اپنے عمل کے حوالے سے دعائیں کیں۔ ان میں سے ایک نے کہا، اے اللہ! تو جانتا ہے، میرے بوڑھے ماں باپ تھے اور شام کے سب سے پہلے انہی کو پلاتا تھا، ان سے پہلے اپنے اہل و عیال کو اور خادم و غلام کو کبھی نہیں پلاتا تھا، ایک دن دور درختوں کی تلاش میں دور نکل گیا، اور جب واپس لوٹ کر آیا تو والدین سوچکے تھے، میں نے شام کا دودھ دوہا اور ان کی خدمت میں لے کر حاضر ہوا تو دیکھا کہ وہ سوچکے ہوئے ہیں، میں نے ان کو جگانا بھی پسند نہیں کیا اور ان سے پہلے اپنے اہل و عیال اور غلاموں کو دودھ پلانا بھی گوارا نہیں کیا، میں دودھ کا پیالہ ہاتھ میں لیے ان کے سرہانے ان کے جاگنے کا انتظار کرتا رہا، جب کہ بچے بھوک کے مارے میرے قدموں میں بلبلاتے رہے، حتیٰ کہ صبح ہوگئی اور وہ بیدار ہوئے، میں نے انہیں ان کے شام کے حصے کا دودھ پلایا اور انہوں نے پیا۔ اے اللہ! اگر یہ کام میں نے صرف تیری رضا کے لیے کیا تھا، تو اس چٹان کی وہ صورت جس نے غار کا منہ بند کردیا ہے، جس مصیبت میں ہم پھنس گئے ہیں، اس سے ہمیں نجات عطا فرما، اس دعا کے نتیجے میں وہ چٹان تھوڑی سی سرک گئی لیکن ابھی اس سے باہر نکلنا ممکن نہیں تھا۔ دوسرے شخص نے دعا کی، یا اللہ! میری چچازاد بہن تھی جو مجھے سب سے زیادہ محبوب تھی (دوسری روایت کے الفاظ یہ ہیں) میں اس سے اتنی شدید محبت کرتا تھا کہ جتنی زیادہ سے زیادہ محبت مردوں کو عورتوں سے ہوتی ہے، پس میں نے (ایک مرتبہ) اس سے اپنی نفسانی خواہش پوری کرنے کا ارادہ کیا، لیکن وہ آمادہ نہیں ہوئی، حتیٰ کہ ایک وقت آیا کہ ایک قحط سالی نے اسے مجبور کردیا، پس اس نے میرے پاس آنے پر آمادگی ظاہر کی، چنانچہ وہ میرے پاس آئی، جب میں اس پر قادر ہوگیا اور وہ میرے قابو میں آگئی، (اپنی نفسانی خواہش پوری کرنے کے لیے) تو اس نے کہا، اللہ سے ڈر اور اس مہر کو ناحق مت توڑ (اس کے ان الفاظ نے، یا اللہ! تیرا خوف مجھ پر طاری کردیا) اور میں اس سے دور ہوگیا، حالانکہ وہ لوگوں میں سب سے زیادہ مجھے پیاری تھی اور میں نے سونے کے وہ دینار بھی چھوڑ دیے، جو میں نے اسے دیے تھے۔ یا اللہ! اگر میں نے یہ کام تیری رضا کے لیے کیا تھا، تو یہ نازل شدہ مصیبت ہم سے دور فرما، چنانچہ وہ چٹان کچھ اور سرک گئی، لیکن اب بھی اس پر قادر نہیں ہوئے کہ اس سے باہر نکلیں۔ تیسرے شخص نے کہا، یا اللہ! میں نے کچھ مزدوروں کو اجرت پر رکھا تھا، سب کو میں نے ان کی اجرت عطا کردی، صرف ایک مزدور اپنی مزدوری لیے بغیر چلا گیا، اس کی مزدوری کی رقم کو میں نے کاروبار میں لگا دیا، یہاں تک کہ اس سے بہت سامان بن گیا، کچھ عرصے کے بعد وہ ایک دن آیا اور آ کر کہا اللہ کے بندے! مجھے میری اجرت ادا کردے، میں نے کہا یہ اونٹ، گائے، بکریاں اور غلام جو تجھے نظر آ رہے ہیں، یہ تیری اجرت کا ثمرہ ہے، اس نے کہا، اللہ کے بندے! مجھ سے مذاق نہ کر، میں نے کہا میں تجھ سے مذاق نہیں کر رہا ہوں (حقیقت بیان کر رہا ہوں) چنانچہ (میری وضاحت پر) وہ سارا مال لے کر چلا گیا، اس میں سے اس نے کچھ نہ چھوڑا، یا اللہ! اگر میں نے یہ کام صرف تیری رضا کی خاطر کیا تھا، تو غار کا منہ کھل جائے، پس وہ چٹان بالکل سرک گئی اور غار کا منہ کھل گیا اور سب باہر نکل گئے۔ (بخاری و مسلم)