شفاعت سے تمام انبیاء کا انکار

حضرت ابو ہریرہ رضی اللہ تعالیٰ عنہ روایت کرتے ہیں کہ رسول اللہ صلی اللہ علیہ وسلم نے ارشاد فرمایا: ”قیامت کے روز اللہ تعالیٰ تمام اگلوں پچھلوں کو ایک ہموار میدان میں جمع فرمائے گا جہاں پکارنے والا آسانی سے پکار سکے گا اور دیکھنے والا آسانی سے دیکھ سکے گا، سورج قریب آ جائے گا جس کی وجہ سے پریشانی اور تکلیف ناقابلِ برداشت ہو جائے گی، لوگ آپس میں کہیں گے دیکھو کس سخت وقت آن پہنچا ہے، کیا ایسا کوئی نہیں جو تمہارے رب کے حضور سفارش کر سکے (تا کہ حساب کتاب شروع ہو)، پس بعض مشورے کے بعد لوگ حضرت آدم علیہ السلام کے پاس جانا چاہیں گے، لوگ حضرت آدم علیہ السلام کے پاس آئیں گے اور عرض کریں گے، آپ ابو البشر ہیں، اللہ تعالیٰ نے آپ کو اپنے ہاتھ سے بنایا اور اپنی روح پھونکی، فرشتوں کو حکم دیا تو انہوں نے آپ کو سجدہ کیا، آپ ہمارے رب کے حضور ہماری سفارش کریں، آج ہم کس مصیبت میں مبتلا ہیں، حضرت آدم علیہ السلام فرمائیں گے میرا رب اس قدر غصے میں ہے اس سے پہلے نہ تھا اور اس کے بعد کبھی نہ ہوگا، مجھے اللہ تعالیٰ نے (جنت میں) درخت کے قریب جانے سے منع کیا تھا لیکن میں نافرمانی کر بیٹھا، مجھے اپنی جان کی فکر ہے، مجھے معاف فرما، (یا اللہ) مجھے معاف فرما، تم لوگ کسی اور کے پاس جاؤ، حضرت نوح علیہ السلام کے پاس جاؤ، لوگ حضرت نوح علیہ السلام کے پاس آئیں گے اور عرض کریں گے، اے نوح! آپ اہلِ زمین کی طرف سب سے پہلے رسول تھے، اللہ تعالیٰ نے آپ کو (قرآن مجید میں) شکر گزار بندہ کہا، آپ دیکھ رہے ہیں کہ ہم کس حال میں ہیں، آپ ہمارے رب کے حضور ہماری سفارش کریں، حضرت نوح علیہ السلام کہیں گے آج میرا رب اس قدر غصے میں ہے کہ اس سے پہلے کبھی نہ تھا اور نہ اس کے بعد کبھی ہوگا، میں نے اپنی قوم کے لیے بددعا کی (اور وہ ہلاک ہو گئی) اس لیے آج مجھے اپنی جان کی فکر ہے، مجھے معاف فرما، (یا اللہ) مجھے معاف فرما، تم لوگ میرے علاوہ کسی اور کے پاس جاؤ، حضرت ابراہیم علیہ السلام کے پاس چلے جاؤ، لوگ حضرت ابراہیم علیہ السلام کے پاس آئیں گے اور عرض کریں گے، اے ابراہیم! آپ اللہ کے نبی اور اس کے خلیل ہیں، آپ ہمارے رب کے حضور ہماری سفارش کر دیجیے، آپ دیکھ رہے ہیں کہ ہم کس حال میں پہنچ چکے ہیں، حضرت ابراہیم علیہ السلام کہیں گے آج میرا رب اس قدر غصے میں ہے کہ اس سے پہلے کبھی نہ تھا اور نہ اس کے بعد کبھی ہوگا، میں نے (دنیا میں) تین جھوٹ بولے تھے اس لیے آج مجھے اپنی جان کی فکر ہے، مجھے معاف فرما، (یا اللہ) مجھے معاف فرما، تم لوگ میرے علاوہ کسی اور کے پاس چلے جاؤ، حضرت موسیٰ علیہ السلام کے پاس چلے جاؤ، (شاید وہ تمہاری سفارش کر سکیں) لوگ حضرت موسیٰ علیہ السلام کے پاس آئیں گے اور عرض کریں گے، اے موسیٰ علیہ السلام! آپ اللہ کے رسول ہیں، اللہ تعالیٰ نے آپ کو اپنی رسالت سے اور اپنے کلام سے سارے لوگوں پر فضیلت عطا فرمائی، آپ ہمارے رب کے حضور ہماری سفارش کر دیجیے، آپ دیکھ رہے ہیں کہ ہم کس حال میں ہیں، حضرت موسیٰ علیہ السلام کہیں گے، آج تو میرا رب اس قدر غصے میں ہے کہ اس سے پہلے کبھی نہ تھا اور نہ اس کے بعد کبھی ہوگا، میں نے (دنیا میں) ایک آدمی کو قتل کر دیا تھا جس کے قتل کرنے کا مجھے حکم نہ تھا اس لیے آج مجھے اپنی جان کی فکر ہے، مجھے معاف فرما، (یا اللہ) مجھے معاف فرما، تم لوگ میرے علاوہ کسی اور کے پاس جاؤ، حضرت عیسیٰ علیہ السلام کے پاس چلے جاؤ، چنانچہ لوگ حضرت عیسیٰ علیہ السلام کے پاس آئیں گے اور عرض کریں گے، اے عیسیٰ علیہ السلام! آپ اللہ کے رسول ہیں اور اللہ تعالیٰ کا وہ کلام ہیں جو اس نے مریم کی طرف القا کیا اور اس کی روح ہیں، آج ہمارے لیے (اللہ کے حضور) سفارش کر دیجیے، آپ دیکھ رہے ہیں کہ ہم کو رہ رہ کر یہ باتیں کہنی پڑ رہی ہیں کہ ہمارا کیا حال ہو رہا ہے، حضرت عیسیٰ علیہ السلام جواب دیں گے، آج تو میرا رب اس قدر غصے میں ہے کہ اس سے پہلے کبھی نہ تھا اور نہ اس کے بعد کبھی ہوگا، (اور کسی گناہ کا ذکر نہیں کریں گے) جواب میں فرمائیں گے تم لوگ میرے علاوہ کسی اور کے پاس چلے جاؤ، حضرت محمد صلی اللہ علیہ وسلم کے پاس حاضر ہو اور عرض کرو، اے محمد صلی اللہ علیہ وسلم! آپ اللہ کے رسول اور خاتم الانبیاء ہیں، اپنے رب کے حضور ہماری سفارش فرما دیجیے، آپ دیکھ رہے ہیں کہ ہمارا کیا حال ہو رہا ہے، (رسول اللہ صلی اللہ علیہ وسلم فرماتے ہیں) چنانچہ میں (میدانِ حشر سے) چلوں گا اور عرش کے پیچھے پہنچ کر اپنے رب عز و جل کے حضور سجدہ میں گر پڑوں گا، اس وقت اللہ تعالیٰ اپنی حمد و ثنا کے وہ الفاظ میرے دل میں ڈال دیں گے جو اس سے پہلے کسی کو نہیں بتائے، پھر ارشاد ہوگا، اے محمد صلی اللہ علیہ وسلم! سر اٹھائیے اور سوال کیجیے، آپ کو دیا جائے گا، سفارش کریں سفارش قبول کی جائے گی، پس میں سر اٹھاؤں گا اور کہوں گا میری امت میری امت، اے میرے رب! تو ارشاد ہوگا اے محمد صلی اللہ علیہ وسلم! اپنی امت کے ان لوگوں کو جن پر کوئی حساب نہیں جنت کے داخلی دروازوں میں سے دائیں دروازے سے داخل کرو، پھر دوبارہ سجدہ کروں گا، پھر اللہ تعالیٰ جو چاہے گا اس وقت تک سجدہ میں پڑا رہوں گا، پھر ارشاد ہوگا اے محمد صلی اللہ علیہ وسلم! سر اٹھائیے اور کہیے تو سنا جائے گا، مانگیے تو دیا جائے گا، سفارش کیجیے تو قبول کی جائے گی، اس وقت میں پھر سفارش کروں گا میرے لیے ایک حد مقرر کر دی جائے گی، ان کو جنت میں داخل کروں گا، پھر واپس آؤں گا اور ارشاد ہوگا اے محمد صلی اللہ علیہ وسلم! سر اٹھائیے، اسی طرح تین اور چار بار سفارش کروں گا (اس کے مطابق) لوگوں کو جہنم سے نکالوں گا، یہاں تک کہ تیسری اور چوتھی بار سفارش کے بعد رسول اللہ صلی اللہ علیہ وسلم فرماتے ہیں، اب اللہ تعالیٰ فرمائے گا جہنم میں کوئی بھی قرآن کے مطابق یعنی قرآن کے حکم کے مطابق باقی نہیں رہا سوائے ان لوگوں کے جنہیں قرآن نے روک رکھا ہے، یعنی جن کو ہمیشہ ہمیشہ جہنم میں رہنا ہے۔“ (بخاری و مسلم)