شفاعت

حضرت انس رضی اللہ تعالیٰ عنہ سے روایت ہے کہ رسول اللہ صلی اللہ علیہ وسلم نے ارشاد فرمایا کہ: "جب قیامت کا دن ہوگا تو لوگوں میں سخت بے چینی اور ازدحام کی کیفیت ہوگی، کچھ لوگ (یعنی اہل محشر کے کچھ نمائندے) آدم علیہ السلام کی خدمت میں حاضر ہوں گے اور عرض کریں گے کہ آپ اپنے رب سے ہماری سفارش کر دیجے، آدم علیہ السلام فرمائیں گے کہ میں اس کام کے لائق نہیں ہوں، لیکن تم ابراہیم علیہ السلام کے پاس جاؤ، وہ اللہ کے خلیل ہیں، پس یہ لوگ ابراہیم علیہ السلام کے پاس جائیں گے، وہ فرمائیں گے کہ میں اس کام کے لائق نہیں ہوں، لیکن تمہیں موسیٰ علیہ السلام کے پاس جانا چاہیے، وہ اللہ کے کلیم ہیں، پس یہ لوگ موسیٰ علیہ السلام کی خدمت میں حاضر ہوں گے، وہ بھی یہی فرمائیں گے کہ میں اس کام کے لائق نہیں ہوں، شاید تمہارا کام کر سکیں عیسیٰ علیہ السلام، وہ روح اللہ اور کلمۃ اللہ ہیں، پس یہ لوگ عیسیٰ علیہ السلام کی خدمت میں حاضر ہوں گے، وہ بھی یہی فرمائیں گے کہ میں اس کام کے لائق نہیں ہوں، لیکن تمہیں محمد صلی اللہ علیہ وسلم کی خدمت میں حاضر ہونا چاہیے، (رسول اللہ صلی اللہ علیہ وسلم فرماتے ہیں) کہ پھر یہ لوگ میرے پاس آئیں گے، (اور شفاعت کے لیے مجھ سے کہیں گے) میں کہوں گا کہ میں اس کام کا ہوں (اور یہ میرا ہی کام ہے)، پھر میں اپنے رب کی بارگاہ کریم میں حاضری کی اجازت طلب کروں گا، مجھے اجازت دے دی جائے گی، اور اللہ تعالیٰ اس وقت مجھے اپنی کچھ خاص تعریفیں اپنی حمد کے لیے عطا فرمائیں گے، تو اس وقت میں اپنی حمد کے ذریعے اللہ تعالیٰ کی حمد و ثنا کروں گا، اور اس کے آگے سجدہ میں گر جاؤں گا، اللہ تعالیٰ کی طرف سے فرمایا جائے گا کہ اے محمد صلی اللہ علیہ وسلم! سر اٹھاؤ، اور جو کہو گے کہا جائے گا، اور جو سفارش کرو گے تمہاری سنی جائے گی، اور جو مانگو گے تمہاری مانی جائے گی، میں کہوں گا کہ اے پروردگار! میری امت میری امت، پس مجھ سے کہا جائے گا، جاؤ، اور جس کے دل میں جو کے دانے کے برابر بھی ایمان ہو، اس کو نکال لو، پس میں جاؤں گا اور ایسا کروں گا، پھر اللہ تعالیٰ کی بارگاہ کرم کی طرف لوٹوں گا، اور پھر انہیں خاص کلمات کے ذریعے اللہ تعالیٰ کی حمد و ثنا کروں گا، اور اس کے آگے سجدہ میں گر جاؤں گا، اللہ تعالیٰ کی طرف سے فرمایا جائے گا کہ اے محمد صلی اللہ علیہ وسلم! سر اٹھاؤ، اور جو کہو گے تمہاری سنی جائے گی، اور جو سفارش کرو گے تمہاری مانی جائے گی، میں کہوں گا کہ اے پروردگار! میری امت میری امت، پس مجھ سے کہا جائے گا کہ جاؤ، اور جن کے دل میں رائی کے دانے کے برابر بھی ایمان ہو، ان کو بھی نکال لو، پس میں جاؤں گا اور ایسا کروں گا، پھر اللہ تعالیٰ کی بارگاہ کرم کی طرف لوٹوں گا، اور پھر انہیں خاص کلمات کے ذریعے اللہ تعالیٰ کی حمد و ثنا کروں گا، اور اس کے آگے سجدہ میں گر جاؤں گا، اللہ تعالیٰ کی طرف سے فرمایا جائے گا کہ اے محمد صلی اللہ علیہ وسلم! سر اٹھاؤ، اور جو کہو گے تمہاری سنی جائے گی، اور جو سفارش کرو گے تمہاری مانی جائے گی، پس میں کہوں گا کہ اے پروردگار! میری امت میری امت، پس مجھ سے کہا جائے گا کہ جاؤ، اور جن کے دل میں رائی کے دانے سے بھی کم ایمان ہو، ان کو بھی نکال لو، پس میں جاؤں گا اور ایسا کروں گا، اور اس کے بعد چوتھی مرتبہ پھر اللہ تعالیٰ کی بارگاہ کرم کی طرف لوٹوں گا، اور پھر انہیں خاص کلمات کے ذریعے اللہ تعالیٰ کی حمد و ثنا کروں گا، اور اس کے آگے سجدہ میں گر جاؤں گا، اللہ تعالیٰ کی طرف سے فرمایا جائے گا کہ اے محمد صلی اللہ علیہ وسلم! سر اٹھاؤ، اور جو کہو گے تمہاری سنی جائے گی، اور جو سفارش کرو گے تمہاری مانی جائے گی، پس میں کہوں گا کہ اے پروردگار! مجھے ان سب کے حق میں سفارش کی اجازت دیجیے، جنہوں نے لا الہ الا اللہ کہا ہو، اللہ تعالیٰ فرمائیں گے کہ یہ کام تمہارا نہیں، لیکن میری عزت و جلال اور میری عظمت و کبریائی کی قسم، میں خود دوزخ سے ان سب کو نکال لوں گا، جنہوں نے لا الہ الا اللہ کہا ہے"۔ (بخاری و مسلم)